27 de outubro de 2024
Premio Internacional de la Imagen Luces de Granada
O fotógrafo e membro de ASFOGAL Roberto Ouro Tubio foi o gañador da categoría de Obra Persoal na X Edición do Premio Internacional de la Imagen Luces de Granada.
A fotografía premiada foi realizada durante a Rapa das Bestas de Sabucedo, na Estrada, e centra a mirada nun cabalo branco rodeado por unha multitude de cabalos escuros. No medio do movemento e da forza da escena, o animal convértese no punto de luz e no centro dunha composición construída desde o contraste, a repetición das formas e o instante.
O galardón foi entregado durante a gala celebrada na Fundación Caja Rural de Granada. Nesta edición participaron máis de 300 obras e entregáronse dez trofeos, un por cada categoría. A exposición reuniu 89 fotografías e pezas audiovisuais, entre obras nominadas e premiadas.
Este recoñecemento abriu unha etapa especialmente importante na traxectoria de Roberto Ouro. Poucos días despois recibiría tamén o Premio LUX Bronce 2024 por El animal y la montaña, confirmando a evolución e a personalidade do seu traballo máis persoal.
