4 de decembro de 2025
Premios LUX 2025 · Disseny Hub Barcelona
A fotógrafa e socia de ASFOGAL Cristina Becerra Lorenzo foi recoñecida co LUX de Ouro na categoría de Reportaxe Social na 33ª edición dos Premios LUX pola súa serie Lembranza.
O traballo recolle o ambiente dun grupo de nenas que acompañan a unha amiga no día da súa primeira comuñón. A través de escenas espontáneas e cotiás, Cristina constrúe un relato no que o protagonismo está nos xestos, nas relacións e nos pequenos momentos que suceden arredor da celebración.
Este LUX de Ouro supón un dos principais recoñecementos da fotografía profesional en España e sitúa Lembranza como o mellor traballo de Reportaxe Social da edición de 2025.
Natural de Cerceda e residente en Buño, Cristina desenvolve o seu traballo profesional desde o seu estudio en Carballo.
A entrega do premio tivo lugar o 4 de decembro de 2025 durante a gala celebrada no Disseny Hub de Barcelona.
Podedes acceder aquí, á nova de La Voz de Galicia
Dende aquí podedes ver os outros gañadores da sua categoría.
Aquí atoparás a nova no Diario de Bergantiños
