23 de febreiro de 2025
Certame de Calificacións FEPFI 2025
Hotel Puerta de Segovia, Segovia
O fotógrafo e presidente de ASFOGAL Marcos Rodríguez recibiu a Distinción Fotográfica da Federación Española de Profesionales de la Fotografía y de la Imagen (FEPFI) pola súa serie Caducifolio.
Marcos Rodríguez recolleu o recoñecemento de mans da fotógrafa Valeria Cassina durante a gala que pechou o Certame de Calificacións 2025, celebrado en Segovia. A distinción valora unha colección de seis fotografías como un conxunto, atendendo á súa coherencia, á capacidade narrativa e á existencia dunha linguaxe propia máis alá do resultado individual de cada imaxe.
Caducifolio é un dos proxectos persoais máis recoñecidos da traxectoria de Marcos Rodríguez. En 2019 xa obtivera con esta serie o LUX de Ouro na categoría de Proxecto Persoal. Seis anos despois, a Distinción Fotográfica de FEPFI volveu recoñecer a forza dun traballo construído desde a luz natural, as formas e a potencia visual.
